ශ්‍රී ලංකාවේ අපනයන වලට ඉහළ විභවයක් විවෘත කිරීමට, ජාත්‍යන්තර වෙළඳ මධ්‍යස්ථානය විසින් ජපන් අරමුදල් අනුග්‍රහයෙන් වැඩමුළුවක් පවත්වනු ලබයි
2025/2/24
පෙබරවාරි 24 වන දින, ශ්‍රී ලංකාවේ ජපන් තානාපති කාර්යාලයේ අමාත්‍ය /නියෝජ්‍ය දූත මණ්ඩල ප්‍රධානී කමොෂිඩා නඔඅකි මහතා, ජපානයට ශ්‍රී ලංකාවේ අපනයන ව්‍යාප්ත කිරීම ප්‍රධාන අරමුණ කරගත් වැඩමුළුවකට සහභාගී වූවන් ඇමතීය. මෙම වැඩමුළුව ජපාන රජය විසින් අරමුදල් සපයනු ලබන සහ ජාත්‍යන්තර වෙළඳ මධ්‍යස්ථානය (ITC) විසින් ක්‍රියාත්මක කරන ලද "ජපානයට අපනයනය වැඩි කිරීමට ශ්‍රී ලංකාවට සහාය වීම" යන ව්‍යාපෘතියේ කොටසකි.
මෙම අවස්ථාවට ශ්‍රී ලංකා අපනයන සංවර්ධන මණ්ඩලය, ශ්‍රී ලංකා වාණිජ හා කර්මාන්ත මණ්ඩල සම්මේලනය, ජපාන විදේශ වෙළෙඳ සංවිධානය, ජපාන ජාත්‍යන්තර සහයෝගිතා නියෝජිතායතනය මෙන්ම ජපන් සහ ශ්‍රී ලංකා පෞද්ගලික සමාගම් වල නියෝජිතයන් ද සහභාගි වූහ. මෙම උත්සවයේදී ශ්‍රී ලංකාවේ අපනයනකරුවන් සහ ජපාන නියෝජිතයින් අතර අත්දැකීම් සහ තොරතුරු හුවමාරු කර ගන්නා ලදී.
ශ්‍රී ලංකාවේ තිරසාර සංවර්ධනය සඳහා වෙළඳාමේ සහ ආයෝජනයේ වැදගත්කම කමොෂිඩා මහතා සිය අදහස් දැක්වීමේදී අවධාරණය කළේය.
විශේෂයෙන් කුළුබඩු අපනයනය ප්‍රවර්ධනය කිරීම සහ කුඩා හා මධ්‍ය පරිමාණ ව්‍යවසායකයන්ගේ ධාරිතාව ශක්තිමත් කිරීම සඳහා ශ්‍රී ලංකාවට සිය අපනයන හැකියාවන් ඉහළ නැංවීම සඳහා ජපානය ලබාදෙන අඛණ්ඩ සහයෝගය ද කමොෂිඩා මහතා විසින් අවධාරණය කරන ලදී.
බණ්ඩාරනායක ජාත්‍යන්තර ගුවන්තොටුපළේ ප්‍රධාන පර්යන්ත පුළුල් කිරීමේ ව්‍යාපෘතියක් නැවත ආරම්භ කිරීම ඇතුළුව ශ්‍රී ලංකාවේ සංචාරක කර්මාන්තය, පුනර්ජනනීය බලශක්තිය සහ යටිතල පහසුකම් සඳහා ජපානයේ අඛණ්ඩ දායකත්වය ද ඔහු මෙහිදී අවධාරණය කළේය.
තිරසාර සංවර්ධනය සඳහා වන ශ්‍රී ලංකාවේ ප්‍රයත්නයන්ට සහාය දැක්වීමට ජපානය කැපවී සිටී. ජපානය සහ ශ්‍රී ලංකාව අතර ද්විපාර්ශ්වික සබඳතාව තවදුරටත් ශක්තිමත් කරමින් ජපානයට අපනයන සහ විදේශ ආයෝජන ඉහළ නැංවීමට අද දින පැවැත්වුනු උත්සවය හේතු වනු ඇතැයි උදක්ම අපේක්ෂා කෙරේ.